UNA MACHINA MITICA:

LA YUGO

Premesso che la Yugo xe una machina che MI personalmente adoro, ve invito a legger un pochi de anedoti e viz divertenti su questa simpatica utilitaria de un tempo.

Tuti a Trieste conossi la Zastava, storica machina costruida in Jugoslavia su licenza Fiat.

I fazeva la 101 (legende disi che sto nome derivi dal fato che la iera fata da 100 tochi italiani e un jugoslavo cioè l’autista) che praticamente iera una 128 ma col portelon (i le fa ancora tute due ma i le ciama Skala) e la 750 che iera una 600 ma un poco più picia e col motor con una cilindrata un poco più alta.

Ma un bel giorno la Zastava buta fora la Yugo, una picia utilitaria col motor de la 127 ma con una nova forma. Sta machineta xe stado un bum per quela volta e ancora ogi se pol dir che in Istria le camina sole. Grazie a un acordo con una nota industria automobilistica americana, sta machineta xe ‘ndada fin in America e là la xe diventada un mito come qua de noi lo xe stado la Prinz, anche grazie al suo nome “Yugo” che in inglese vol dir “you go” ossia “tu vai” ligà inveze al fato che sto auto NON andava. E pensar che per l’America i ga fato anche un model cabrio.

In confronto a le machine che gira in America, la Yugo iera picia, streta, scomoda, lenta, poco sicura e la se rompeva ogni do per tre, cussì che la xe diventada el bersaglio preferito de tanti viz e ancora ogi i americani se la ricorda come una legenda impossibile ma vera.

A Trieste, fin prima de la disgregazion de la Jugoslavia, iera sempre pien de Zastava dei aquirenti de oltre confin che se molava anche da posti vizin l’Ungheria per vignir a far la spesa qua con machine che a volte iera veri e propri ruderi. Cussì anche da noi la Zastava xe restada un mito, coi sui colori blu fastidio, rosso canon in tel’ocio, arancio mal de panza e verde ocio de soto e spesso in compagnia saltava fora la canzon che fazeva:

(su le note de “che sarà” )
Zastava, Zastava, Zastava-a-a
ti ze machina che tuti gavarà
con speceto retrovizor che ze come televizor
Zastava, Zastava, Zastava

Machina mia, che ti sta in concessionaria
tuta lustra come un grande machinon
ti ze machina sai bela ti ga mile opzional
Zastava, ti ze machina che val.

Zastava, Zastava, Zastava-a-a
ti ze machina che tuti gavarà,
ti ga specieto retrovizor grande come televizor,
Zastava, ti ze auto che val.

Amici miei ga tuti Mini Minor
altri ga Zinquezento jala
ti ze blu scuro, ti xe maron, ti ti ze color che ti ti vol
Zastava ti xe auto multicolor

Zastava, Zastava, Zastava-a-a
ti ze machina che tuti gavarà,
ti ti ze machina special
mi ti go ciolto per Nadal
Zastava ti ze machina che val

Ma intando ridendo e scherzando laYugo continua a vignir fora de la fabrica, anzi vardè qua come nei ani i xe rivai a farla sembrar sportiva, con una linea accattivante e aggressiva

Navigando in internet se pol trovar tante de quele pagine con barzelete e viz su la povera Yugo e mi le go tradote in triestin e ve le meto qua soto, per la serie: cossa che NO sucedi quando te frachi sul’acelerator:

Cossa ga in comun una Yugo e una Ferari?
La Ferari va da 0 a 100 in 4 secondi, la Yugo va da 0 a 4 in 100 secondi

Perché le Yugo ga el  lunoto termico?
Per scaldarse le man in inverno quando te le sburti

Perché esisti i marciapie?
Perché i proprietari de la Yugo i possi gaver un modo sicuro per tornar a casa

Come se fa a far andar veloce una Yugo?
Tacandola drio un areoplan

E come se la fa far andar ancora più veloce?
Studando el motor

Come te fa a radopiar el valor de una Yugo?
Faghe el pien de benzina, opur se la Yugo xe vecia, basta meter una confezion de un litro de late nel baul

Come se ciama i passegeri de una Yugo?
Amortizatori

Perché tuti i proprietari de una Yugo va in paradiso?
Perché i xe za stadi in inferno

Come se ciama la Yugo con el dopio tubo de scarigo?
Cariola

Che diferenza xe tra una baleta de golf e una Yugo?
La baleta de golf te la pol far andar 500 metri più in avanti

Che diferenza xe tra una Yugo e un carel de la spesa?
El carel de la spesa xe più facile de sburtar

Che diferenza xe tra una Yugo e un testimone de Geova?
Al testimone de Geova te pol sbaterghe la porta

Perché la Yugo subissi pochi dani in un incidente?
Perché la magior parte dei dani li subissi el caro atrezi

Cossa i ghe da a chi compra una Yugo insieme al libreto de le istruzioni?
La cartina coi percorsi e i orari dei autobus

Cossa se disi se se vedi una Yugo in zima a una salita?
– “Un miracolo !”

La Yugo ga adotado un novissimo “air-bag a pedal”: quando l’autista percepissi el pericolo de un incidente el comincia a pompar sul pedal e ghe se gonfia el balon.

Un tizio su una Yugo con aria de figo se afianca a un Ferari, el tira zo el finestrin e el ghe ziga a l’autista de la Ferari:
– Ciu ti, te ga el frigobar in tela Ferari, ara che mi lo go su la mia Yugo
E el tipo de la Ferari con aria de suficenza
– Ovio che lo go
– Ciu ti, te ga l’impianto aifai coi wufer, ara che mi go tuto in baul su la mia Yugo
E el tipo del Ferarin, un poco stufo
– Ma si che lo go, che monade.
– Ciu ti te ga i sedili in pele, ara che mi li go su sta mia Yugo
El tipo de la Ferari sempre più el se rompi:
– Ma sicuro che go i sedili in pele.
– Ciuuu e te ga la machineta per far i pop-corn, mi lo go su la mia Yugo
Porca vaca el tipo no la ga. Vien el verde el tira una verta e el fuga via. Come prima roba el cori dal concessionario a farse montar la machineta per i pop-corn.
Fato el lavor el comincia andar in zerca del tipo co la Yugo e gira gira tuto el giorno vien la sera e no’l lo trova.
Ormai aflito el fa per tornar a casa quando per strada el vedi la Yugo in postegio coi vetri apanadi. El se avicina e el bati sui vetri ma gnente. Bati e ribati finchè el vedi che de dentro un col dito neta e varda fora e lui ghe ziga:
– salve, son mi, quel de la Ferari de stamatina al semaforo, la se ricorda? Volevo dirghe che anche mi go la machineta dei pop-corn a bordo de la mia Ferari.
El tipo nela Yugo cala el finestrin e el disi:
– E ghe par che per sta monada la vien romperme le bale proprio co me fazo la docia?

Ed ecco qua le barzelette mandade dai nostri visitatori

Eco una nova barzeleta mandada da Mario de Trieste:
Un tipo a bordo dela sua Yugo tuta ruzinida e cariga de cassete de verdura, el se ferma al semaforo de Buie. Intanto che’l speta che rivi el verde ghe se meti de fianco un’auto rossa, bassa che fa un rumor fortissimo. El ciol un cazavide, el smonta el finestrin e el ghe bati sul vetro al tipo de stò auto rosso.
Bongiorno, la me perdoni, ma che auto xe questa?
El mato tuto tronfio ghe rispondi: Una Ferrari!
El tipo de la Yugo scassa la testa e ghe disi: Mah, devi esser una machina che ga un mucio de problemi!
E quel dela Ferrari: Perchè?
Perchè no ghe se ne vedi tante in giro!

Eco le ultime monade che gira in Istria (grazie a un amico de Rovigno):
Un tipo va in consessionaria e domanda:
Bongiorno, me interessasi el novo model de Yugo.
Bongiorno, la vegni con mi. Ecola qua!
Uhm… vedo vedo, ma cossa la ga el clima?
Come no! La ga el clima, l’Abs, i airbags!
E magari la ga anche l’antifurto e la chiusura centralizada?
Oviamente: chiusura co’l telecomando e antifurto satelitare!
Ma lei la me ciol pe’l fioco?
Si, ma lei la ga comincià per primo!

Eco cossa che ne conta tal “Valdarche”, lussignan emigrado in America:
Quando la Yugo xe rivada in America, tuti diseva “Yugo, Yugo, Yu-go nowhere” ossia “Yugo, Yugo, tu vai (yu-go alias you go) in nessun logo”
Le Yugo xe come le botilie de Coca-Cola: co le xe svode te le porti indrio e i te da 5 centesimi per el riciclagio; co te porti indrio la Yugo perché no la funziona più, i te da anche 5 centesimi per el riciclagio… i fa scatole de sardine.
GRAZIE VAL ….

(pagina, testo ed immagini di Massimo Barbo dd. 25.11.2001)
Attenzione: dal mese di luglio 2002 il testo di questa pagina è stato oggetto di passaparola via mail e successivamente nei social network iniziato da qualche simpatico visitatore. La pagina ha così riscosso un grossissimo successo visto il copioso divulgarsi delle mail e delle condivisioni da cui le conseguenti  note di apprezzamento che ho ricevuto.
Grazie a tutti! Massimo