Le disgrazie del Tran de Opcina
de Diego Manna
De sto libro podessi dir tante robe: che el xe divertente, che el xe geniale, che el xe spassoso ma in pratica dirò una roba sola, che el xe BEL!
Del resto el triestin xe tanto rico de vocaboli precisi e miradi quanto in certi casi con una parola semplice se riassumi in maniera eficace un insieme de significati diversi e se ve digo che ‘sto libro xe BEL, credeme che’l xe proprio BEL!
Ok, mi son un grande fan del scritor Diego Manna, tuti i sui libri me ga sempre piasso e ogni novo libro che el fazeva iera sempre un poco meio de quel prima che za de suo iera un bel lavor, ma con questo libro Diego ga superà se stesso. Se prima iera dei divertentissimi resoconti de viagio o racolte de storie divertenti, sto giro el ga scrito quel che se podessi dir un romanzo domacio, con una trama inverigolada in un ambiente nostran, insoma un poliziesco, un zalo, un libro de aventure, tuto in t’un.
In pratica xe una storia fantastica de un grupo de muleti che vol ripristinar el dialeto triestin in una zità del futuro dove el gnanchepelculismo tipico dei triestini ga lassà che i furlani se impossessi de la zità con conseguente divieto de l’uso del dialeto. Ma no xe una storia de campanilismo o, pezo ancora de odio, xe anzi una storia de amicizia e simpatico rispeto tra triestini e furlani, dove el Tran de Opcina, un dei simboli del capoluogo giuliano, entra de prepotenza in un ruolo magico e decisivo per le sorti del dialeto triestin.
Insoma el mitico Diego Manna ve tegnerà incolai al libro e no vederé l’ora de veder come che va a finir la storia, lassandove a boca verta ogni volta che in tela storia compari un personagio de la scenografia mitologica de Trieste (Gigi Pirola, la muta, e basta per no far altri spoiler) in un intreccio de situazioni comiche e surreali, tute carighe de tanto ma proprio tanto morbin.
E ‘lora cossa speté? Se ancora no lo gavé ciolto fe un click sul link qua de soto, in qualunque momento perché xe un libro che ve tignerà compagnia col caldo o col fredo, col sol o con la piova, con un bicer de Teran o con un calice de Malvasia.
Massimo Barbo – TuttoTrieste.net
Le disgrazie del Tran de Opcina – Diego Manna autore – White Cocal Press editore
lo podé trovar su Amazon, anche in formato per kindle